Հրանտ Տիգրանի Ադոնցը ծնվել է 1914 թ. սեպտեմբերի 15-ին Բաքու քաղաքում, բանվորի ընտանիքում։ 1930 թ. ավարտել է Բաքվի թիվ 25 միջնակարգ դպրոցը։ 1933 թ. ավարտել է Կապի Անդրկովկասյան տեխնիկումը՝ ստանալով ռադիոտեխնիկի որակավորում։ Երկու տարի աշխատել է Բաքվի ռադիոհաղորդման կենտրոնում որպես ռադիոտեխնիկ։ 1940 թ. ավարտել է Բաքվի Ադրբեջանական Ինդուստրիալ ինստիտուտի էներգետիկական ֆակուլտետը՝ ստանալով էլեկտրական ցանցերի և համակարգերի ինժեներ-էլեկտրիկի որակավորում։ 1941 թ. օգոստոսից մինչև 1946 թ. ապրիլ ամիսը Սովետական Բանակի ինժեներական զորամասերում ծառայել է որպես սպա, իսկ այնուհետև որպես ավագ ինժեներ-էլեկտրիկ և մասնակցել հատուկ հետախուզական աշխատանքների։ 1944 թ. հոկտեմբերի 13 –ին պարգևատրվել է «Կովկասի պաշտպանության համար», իսկ 1945 թ. մայիսի 5 – ին «1941-1945 թթ. Հայրենական մեծ պատերազմում Գերմանիայի դեմ տարած հաղթանակի համար» մեդալներով։
1946 թ. ապրիլից որպես գիտաշխատող, իսկ 1952 թ. ապրիլից որպես էլեկտրահամակարգերի լաբորատորիայի ղեկավար աշխատել է Ադրբ. ԳԱ էներգետիկայի ինստիտուտում։
1955 թ. Կրժիժանովսկու անվան էներգետիկայի ինստիտուտում պաշտպանել է դոկտորական դիսերտացիա «Էլեկտրական համակարգերի բարդ ոչ սիմետրիկ ռեժիմների հաշվարկի տեսությունն ու մեթոդները» թեմայով։ 1956 թ. հունիսին ՀԱՀ – ը հաստատել է Հրանտ Տիգրանի Ադոնցի՝ տեխնիկական գիտությունների դոկտորի գիտական աստիճանը։
1956 թ. օգոստոսին հրավիրվել է աշխատելու ՀՍՍՀ ԳԱ։ Նշանակվել է էլեկտրատեխնիկայի լաբորատորիայի դիրեկտոր։ 1956 թ. սեպտեմբերից մինչև 1970 թ. համատեղության կարգով աշխատել է Երևանի Կ. Մարքսի անվան պոլիտեխնիկական ինստիտուտում, որտեղ կարդացել է դասախոսություններ էլեկտրատեխնիկայի տեսական հիմունքների վերաբերյալ և բազմաբևեռի տեսության մասնագիտական դասընթաց։ 1958 թ. Հրանտ Տիգրանի Ադոնցը ստացել է պրոֆեսորի գիտական կոչում։ 1959 թ. հուլիսից մինչև 1961 թ. մարտը եղել է ԳԱ էլեկտրատեխնիկայի ինստիտուտի դիրեկտոր, համատեղությամբ՝ Երևանի պոլիտեխնիկական ինստիտուտի տեսական էլեկտրատեխնիկայի ամբիոնի վարիչ, իսկ 1961 թ. մարտից մինչև 1963 թ. մարտը՝ ԳԱ էներգետիկայի ինստիտուտի դիրեկտոր։ 1963 թ. մարտին նշանակվել է ՍՍՀՄ էներգետիկայի մինիստրության էներգետիկայի ինստիտուտի դիրեկտոր և ընտրվել է ՀՍՍՀ ԳԱ թղթակից-անդամ։
1965 թ. մայիսի 7 – ին պարգևատրվել է «1941-1945 թթ. Հայրենական մեծ պատերազմի հաղթանակի 20 տարին» մեդալով, 1966 թ. դեկտեմբերի 22 – ին՝ Հայկ. ՍՍՀ Գերագույն սովետի պատվոգրով (№15097), 1970 թ. մարտի 31 – ին՝ «Փայլուն աշխատանքի համար» մեդալով Վ. Ի. Լենինի ծննդյան 100 – ամյակի առթիվ։
Ադոնցի ղեկավարությամբ ստեղծվել է նոր ավտոմատացված անալոգային հաշվողական մեքենա, որը ներդրված է Չիտաէներգո, Կիրգիզէներգո, Սոլդովէներգո և այլ էներգահամակարգերում։ Նրա ղեկավարությամբ կատարվել են նաև հետազոտություններ միջհամակարգային էլեկտրահաղորդումների զարգացման, միացյալ էներգահամակարգերի ստատիկ ու դինամիկ կայունության, էլեկտրահաղորդման գծերի ավտոմատ կրկնակի միացման ռեժիմների բնագավառում, և արդյունքներն արմատավորվել են հայկական, անդրկովկասյան և այլ էներգահամակարգերում։