Լ. Մ. Ջանփոլադյանը ծնվել է 1912 թ. Երևանում: 1926-1930 թթ. սովորել է Երևանի այգեգործական տեխնիկումում, որն ավարտելուց հետո, 1930-1931 թթ., աշխատել է Անդրկովկասի ջրային տնտեսության հիդրոմելիորատիվ կայանում (ք. Էջմիածին) որպես լաբորանտ: 1931-1936 թթ. սովորել է Մոսկվայի Կ. Տիմիրյազևի անվան գյուղատնտեսական ակադեմիայի ագրոքիմիական ֆակուլտետում: 1936 թ. ընդունվել է վերոհիշյալ ակադեմիայի ասպիրանտուրա՝ օրգանական քիմիայի գծով: Հիվանդության պատճառով տարեկետում է վերցրել, և 1938-1939 թթ., աշխատել է Երևանի խաղողագինեգործական «Արարատ» տրեստի կենտրոնական լաբորատորիայում որպես վարիչ: 1940-1941 թթ. շարունակել է ուսումնառությունը ասպիրանտուրայում: 1941 թ. համալրել է ԽՄԿԿ շարքերը, ավարտել է ասպիրանտուրան ատենախոսության պաշտպանությամբ և նրան շնորհվել է քիմիական գիտությունների թեկնածուի գիտական աստիճան:
1941-1943 թթ. ղեկավարել է «Արարատ» տրեստի գիտահետազոտական լաբորատորիան: 1941-1947 թթ., համատեղության կարգով, աշխատել է Երևանի պետական համալսարանի օրգանական քիմիայի ամբիոնում որպես դոցենտ: 1943-1946 թթ. եղել է Հայկ. ՍՍՀ սննդի արդյունաբերության ժողովրդական կոմիսարի տեղակալը, իսկ 1946-1947 թթ. զբաղեցրել է Հայկ. ՍՍՀ սննդի արդյունաբերության ժողովրդական կոմիսարի պաշտոնը: 1947-1952 թթ., արդեն որպես հիմնական աշխատող, աշխատել է Երևանի պետական համալսարանի օրգանական քիմիայի ամբիոնում որպես դոցենտ: 1948-1951 թթ.եղել է Խաղողագործության (այգեգործության) գինեգործության և պտղաբուծության հայկական գիտահետազոտական ինստիտուտի «Կոնյակի լաբորատորիայի» վարիչը, 1948-1952 թթ.` վերոհիշյալ ինստիտուտի գինեգործության բաժնի վարիչը (համատեղությամբ), իսկ 1951-1994 թթ.՝ «Գինու և կոնյակի տեխնոլոգիայի բաժնի» վարիչը (1951-1962 թթ.՝ հիմնական աշխատանք, 1963-1984 թթ.՝ համատեղությամբ, 1984-1994 թթ.՝ հիմնական աշխատանք):
1955-1958 թթ. եղել է Սննդի արդյունաբերության գիտատեխնիկական ընկերությունների հանրապետական վարչության ընտրված նախագահը: Լինելով ՀԽՍՀ գիտատեխնիկական ընկերությունների պատվավոր անդամ, 1958 թ. ընտրվել է ՀԽՍՀ գիտատեխնիկական ընկերությունների հանրապետական խորհրդի նախագահ: 1962 թ. ընտրվել է Գիտատեխնիկական ընկերությունների համամիութենական խորհրդի պլենումի անդամ: 1963-1965 թթ. զբաղեցրել է Հայկ. ԽՍՀ նախարարների խորհրդի գիտատեխնիկական աշխատանքների կոորդինացման պետական կոմիտեի նախագահի առաջին տեղակալի պաշտոնը:1964 թ. ընտրվել է ՀԱՄԽ պլենումի անդամ: 1965 թ. ընտրվել է Գյուտ. և ռաց. հանրապետական խորհրդի պլենումի անդամ և ՀԽՍՀ սննդի արդյունաբերության փոխնախարար:
1966 թ. Լ. Մ. Ջանփոլադյանին շնորհվել է տեխնիկական գիտությունների դոկտորի գիտական աստիճան, 1967 թ.՝պրոֆեսորի գիտական կոչում «Գինու և կոնյակի տեխնոլոգիա» մասնագիտությամբ, ինչպես նաև, ՀԽՍՀ գիտության և տեխնիկայի վաստակավոր գործչի կոչում: 1971 թ. ընտրվել է ՀԽՍՀ ԳԱ թղթակից-անդամ «Գյուղատնտեսական գիտություններ» մասնագիտության գծով:
1994 -1997 թթ. եղել է Խաղողագործության, գինեգործության և պտղաբուծության հայկական գիտահետազոտական ինստիտուտի «Գինու և կոնյակի տեխնոլոգիայի բաժնի» վարիչը:
Լ. Մ. Ջանփոլադյանը բազմաթիվ գիտական աշխատանքների և գյուտերի հեղինակ է: Նրա հիմնական աշխատանքներն ուղղված են գինու, կոնյակի քիմիայի հետազոտություններին, խաղողի վերամշակման տեխնոլոգիական պրոցեսների մշակման, կատարելագործման, խաղողի՝ որպես գինու հումքի, որակի բարձրացման հարցերին: Բազմաթիվ ուսումնասիրություններ է կատարել գինու որակի վրա պարարտանյութերի ազդեցության ուղղությամբ, մշակել է խաղողի վազի պարարտացման տարբերակված համակարգ, առաջարկել է գինու և կոնյակի որակի բարձրացման հետ կապված խաղողի մշակման եղանակներ, որոնք կիրառվել են արտադրությունում:
Լ. Մ. Ջանփոլադյանի տեսական և կիրառական հետազոտությունները մեծ ճանաչում են բերել նրան Հայաստանում և արտասահմանում: Խաղողագործության, գինեգործության և պտղաբուծության հայկական գիտահետազոտական ինստիտուտի գինու և կոնյակի տեխնոլոգիայի բաժնում նրա ղեկավարությամբ իրականացվել են լայնածավալ աշխատանքներ, որոնց արդյունքները հրապարակվել են ամսագրերում, մենագրություններում, հեղինակային վկայականների ձևով, իսկ ներդրումը արտադրության մեջ՝ տնտեսական բարձր արդյունավետությամբ, հանրապետությանը տվել է հսկայական եկամուտներ:
Բազմաթիվ աշխատանքներ են տարվել կապված՝ խաղողի վերամշակման և գինու նոր՝ գազացված, արոմատացված թնդեցված տեսակների ստացման հետ /117, 119, 134/ (փակագծերում նշված են թղթակից անդամ ընտրվելուց հետո կատարված հետազոտությունները ըստ 3.3 ձևի):
Լ. Մ. Ջանփոլադյանի կողմից մշակվել են խաղողն անընդհատ հոսքով թառամեցնելու եղանակով կիսաքաղցր և թնդեցրած գինիներ ստանալու տեխնոլոգիաներ /104, 109, 110, 131, 149/, գինիների կայունացման եղանակներ՝ ֆլոկուլյանտներով, ուլտրաձայնով, և նոր տեխնոլոգիաներ /90, 127, 128, 161, 162/, խաղողի վերամշակման թափոնները օգտագործելու միջոցներ /108/, ոչ ալկոհոլային խմիչքների կայունացման ձևեր /118, 119, 120/:
Նախագծվել է շիթային ռեակտոր՝ գինիների մշակման և գինեթթվակիր ստանալու համար /93, 94,153, 156/:
Լ. Մ. Ջանփոլադյանի ղեկավարությամբ լայն հետազոտություններ են կատարվել կոնյակի արտադրության պրոցեսների ուսումնասիրության ուղղությամբ: Քիմիական փոփոխությունների հետազոտությունները հրապարակվել են մամուլում, զեկուցվել են կոնֆերանսներում /98, 100, 101, 102, 121, 122, 124, 126/: Լ. Մ. Ջանփոլադյանի կողմից կատարելագործվել է կոնյակի սպիրտի հնեցման տեխնոլոգիան, մշակվել և ներդրվել է կոնյակի սպիրտը բաբախող հոսքով հնեցնելու եղանակը /99, 104, 106, 107, 123, 125, 132, 147, 149, 157, 158/: Հիմնավորվել և հրապարակվել են կոնյակի քիմիայի և տեխնոլոգիայի հիմնական դրույթները /101, 11, 115, 129, 130, 143, 144/:
Լ. Մ. Ջանփոլադյանը հրապարակել է հետազոտություններ, առաջարկություններ գինու, կոնյակի պատմության, էկոնոմիկայի շուրջ /110, 133, 135, 138, 139, 140, 141, 142/, պեղումների, հնագույն ձեռագրերի, արխիվային նյութերի և գրական աղբյուրների հիման վրա հանգամանալից աշխատել է Հայաստանի գինեգործության և կոնյակագործության պատմության վրա՝ ինստիտուտում խաղողի, գինու թանգարան գինեդարանի թեմայով:
Լ. Մ. Ջանփոլադյանի գիտահետազոտական աշխատանքները մեծապես նպաստել են գինու և կոնյակի քիմիայի ավելի խոր հիմնավորմանը, նոր տեխնոլոգիական պրոցեսների մշակմանը, կատարելագործմանը: Նա է կազմել Հայաստանի միկրոգոտիավորման քարտեզը ըստ գինիների տեսակների:
Լ. Մ. Ջանփոլադյանը արժանացել է ՀԽՍՀ գերագույն խորհրդի Պատվոգրի 1961, 1972, 1982 և 1984 թթ., 1972 թթ.՝ «Աշխատանքային արիության համար» մեդալի, 1967 թ.՝ «Պատվո նշան» շքանշանի, 1970 թ.՝ Վ. Ի. Լենինի 100-ամյակի մեդալի, 1971 թ.՝ «Աշխատանքային Կարմիր դրոշ» շքանշանի, 1975 թ.՝ «Աշխատանքի վետերան» մեդալի, 1985 թ.՝ Էջմիածնի գործադիր կոմիտեի Պատվոգրի:
1958 թ. Լ. Մ. Ջանփոլադյանը եղել է Հունգարիայում (աշխատանքային գործուղում), 1961 թ.՝ Բուլղարիայում (դելեգացիայի հետ), 1963 թ.՝ Լեհաստանում (դելեգացիայի հետ), 1965 թ.՝ Ֆրանսիայում (գիտական տուրիզմ), 1969 թ.՝ Ֆրանսիայում (աշխատանքային գործուղում), 1969 թ.՝ Ռումինիայում՝ (դելեգացիայի հետ):
Լ. Մ. Ջանփոլադյանը հանդիսացել է Խաղողագործության (այգեգործության), գինեգործության և պտղաբուծության հայկական գիտահետազոտական ինստիտուտի, Էկոնոմիկայի ինստիտուտի, Տեխնիկական ինֆորմացիայի ինստիտուտի, Գյուղատնտեսության նախարարության գիտական խորհուրդների անդամ, «Виноделие и виноградарство СССР» և «Наука и жизнь» ամսագրերի խմբ. անդամ, ակտիվորեն մասնակցել է Խաղողագործության և գինեգործության միջազգային կոնգրեսների և մրցույթների Բուդապեշտում, Թբիլիսիում, Յալթայում, Գինու և կոնյակի համամիութենական կոնֆերանսների, եղել է Կոնյակի՝ 1957 և 1968 թթ. համամիութենական կոնֆերանսների կազմակերպիչը և Հայաստանում հասարակական ասպիրանտուրայի հիմնադիրներից մեկը:
Լ. Մ. Ջանփոլադյանը մեծ ավանդ ունի գիտական կադրերի պատրաստման գործում: Նրա անմիջական ղեկավարությամբ պաշտպանվել են մի շարք դոկտորական և թեկնածուական թեզեր, բազմիցս եղել է թեզերի պաշտպանության ընդդիմախոս: 6 տարի դասավանդել է Երևանի պետական համալսարանում:
Լ. Մ. Ջանփոլադյանը եղել է ԽՍՀՄ գինեգործության առաջատար մասնագետներից մեկը: Նա հաջողությամբ համատեղել է գիտական գործունեությունը գիտության ձեռքբերումները արտադրության մեջ ներդնելու հետ: Նրա ակտիվ մասնակցությամբ սննդի արդյունաբերությունում իրականացվել է արտադրության տեխնիկական վերազինում, արտադրանքի նոր տեսակների յուրացում, նոր ձեռնարկությունների՝ հատկապես գինու և կոնյակի գործարանների կառուցում Հայաստանում: Նրա աշխատանքները մեծապես նպաստել են գինեգործության և կոնյակի արտադրության տեխնոլոգիական պրոցեսների կատարելագործմանը, գինու և կոնյակի որակի բարելավմանը, նոր արտադրատեսակների ստեղծմանը: