Կարեն Սուրենի Պողոսյանը ծնվել է 1932 թ. նոյեմբերի 21-ին, Երևանում, ծառայողի ընտանիքում: Վախճանվել է 2016 թ. մարտի 26-ին:
1940 թ. ընդունվել է Վ. Վ. Մայակովսկու անվ. թիվ 7 ռուսական դպրոց:
1950 թ. ընդունվել է Մոսկվայի Մ. Վ. Լոմոնոսովի անվ. պետական համալսարանի կենսաբանահողագիտական ֆակուլտետ:
1955 թ. ավարտել է հիշյալ ֆակուլտետի գենետիկայի և սելեկցիայի ամբիոնը և՝ գործուղվել Հայաստան:
1956 թ. ընդունվել է աշխատանքի ՀԽՍՀ Գյուղ. նախարարության «Պատվո նշան»-ի շքանշանակիր Խաղողագործության, գինեգործության և պտղաբուծության գիտահետազոտական ինստիտուտի Բույսերի ֆիզիոլոգիայի և կենսաքիմիայի բաժնում որպես լաբորանտ:
1957 թ. ընդունվել է ասպիրանտուրա՝ բույսերի ֆիզիոլոգիա մասնագիտությամբ:
1960 թ.ավարտել է ասպիրանտուրան:
1960-1966 թթ. ՀԽՍՀ Գյուղ. նախարարության «Պատվո նշան»-ի շքանշանակիր Խաղողագործության, գինեգործության և պտղաբուծության գիտահետազոտական ինստիտուտի Բույսերի ֆիզիոլոգիայի և կենսաքիմիայի բաժնում աշխատել է որպես կրտսեր գիտաշխատող:
1961 թ. պաշտպանել է թեկնածուական ատենախոսություն «Խաղողի վազի ձմեռման և կոփման ֆիզիոլոգիական առանձնահատկությունները» թեմայով, որի համար նրան շնորհվել է կենսաբանական գիտությունների թեկնածուի գիտական աստիճան:
1965 թ.՝ ԽՄԿԿ անդամ:
1966-1969 թթ. ՀԽՍՀ Գյուղ. նախարարության Խաղողագործության, գինեգործության և պտղաբուծության գիտահետազոտական ինստիտուտի Բույսերի ֆիզիոլոգիայի և կենսաքիմիայի բաժնում աշխատել է որպես ավագ գիտաշխատող:
1969 թ. վերապատրաստման նպատակով գործուղվել է Հոկայդոյի համալսարանի (ք. Սապպորո, Ճապոնիա) ցածր ջերմաստիճանների ինստիտուտ:
1969-1974 թթ., գործուղումից վերադառնալուց հետո, շարունակել է աշխատել որպես ավագ գիտաշխատող:
1973 թ. պաշտպանել է դոկտորական ատենախոսություն «Խաղողի վազի ցրտադիմացկունության ֆիզիոլոգիան» թեմայով:
1974 թ. շնորհվել կենսաբանական գիտությունների դոկտորի գիտական աստիճան:
1974-1988 թթ.՝ ՀԽՍՀ Գյուղ. նախարարության խաղողագործության, գինեգործության և պտղաբուծության գիտահետազոտական ինստիտուտի Բույսերի ֆիզիոլոգիայի և կենսաքիմիայի բաժնի վարիչ:
1975 թ. լույս է տեսել «Խաղողի բույսի ցրտադիմացկունության ֆիզիոլոգիական առանձնահատկությունները» մենագրությունը (Физиологические особенности морозоустойчивости виноградного растения. Монография. Ер.: Изд. АН Арм. ССР. – 1975. –240 с.):
1980 թ-ից նա, համատեղության կարգով, դասավանդել է Երևանի պետական համալսարանի Ֆիզիոլոգիայի ամբիոնում (կենսաբանության ֆակուլտետ), կարդացել է մասնագիտական դասընթացներ՝ «Ցրտադիմացկունության ֆիզիոլոգիա» և «Բույսերի ջրային ռեժիմը»:
1981 թ. Գյուղատնտեսական գիտությունների Վ. Ի. Լենինի անվ. համամիութենական ակադեմիայի կողմից արժանացել է Կ. Ա. Տիմիրյազևի անվ. Ոսկե մեդալի՝ վերոհիշյալ մենագրության համար:
1988 թ-ից՝ ՀԽՍՀ Գյուղ. նախարարության Խաղողագործության, գինեգործության և պտղաբուծության գիտահետազոտական ինստիտուտի Խաղողի սելեկցիայի, ֆիզիոլոգիայի և կենսաքիմիայի բաժնի վարիչ:
1989 թ. շնորհվել է պրոֆեսորի գիտական կոչում՝ բույսերի ֆիզիոլոգիա մասնագիտությամբ:
1990 թ. ՀՀ Գյուղատնտեսական գիտությունների ակադեմիան, իր կանոնադրության հիման վրա, Կ. Ս. Պողոսյանին ընտրել է Ակադեմիայի թղթակից-անդամ:
1996 թ. Կ. Ս. Պողոսյանը ընտրվել է ՀՀ ԳԱԱ ակադեմիկոս «Կենսաբանություն» մասնագիտության գծով: