8 չհ, 628 (ՈՒԸ), 834 (ՊԼԴ) (=1470) երկսյուն էջ։ Քառածալ, մամուլանիշերը հայատառ և արաբական թվանշաններով։ Տիտղոսաթերթը` զարդափակ։ Էջախորագրերով և լուսանցանիշերով։ 160 փորագիր պատկեր փորագրողի` Քր. վան Զիխեմի անվանատառերով (CVS)։ Փորագրությունները արված են այնպիսի մեծանուն վարպետների  գործերից, ինչպիսիք են Ալբրեխտ Դյուրերը, Ռաֆայելը, Հենրիկ Գոլցիուսը և ուրիշներ: Գլխազարդեր, վերջազարդեր, լուսանցազարդեր և զարդագրեր։ Բնագիրը 10 կետաչափի բոլորագրով, օգտագործված են նաև նոտրգիր և գլխագրեր։

Հիշատակարան ունի:

Ըստ «Հայ գիրքը 1521-1800 թթ.» մատենագիտական ցանկի (Երևան, 1988, էջ 50)՝ Զ. Պտուկյանը Հայաստանի ազգային գրադարանին է ուղարկել իր ունեցած Ոսկանյան Աստվածաշնչի մանրաժապավենը. որի շնորհիվ պարզվել է, որ այդ օրինակի մեջ Նոր Կտակարանը 26 էջով պակաս է, այսինքն՝ ոչ թե 834 էջ է, ինչպես նշված է ներկա նկարագրության մեջ, այլ 808 էջ։ Համեմատությունից պարզվեց, որ Զ. Պտուկյանի օրինակում բացակայում են «Աղօթք Մանասէի արքայի Յուդայի» և «Գիրք Եղրասայ չորրորդ» մասերը, որոնք մեզ հայտնի օրինակներում գտնվում են 719-744 էջերում։ Որոշ տարբերություն կա նաև հիշատակարանում (ավելի մանրամասն տես՝ Ք. Կորկոտյան, Ն. Ոսկանյան՝ Հայերեն Աստվածաշնչի առաջին տպագրությունը և նրա տարբերակը։- «էջմիածին», 1966, N ԺԱ-ԺԲ, էջ 168-175)։